Steve Jobs........iSorry

بصراحة هاي الايام صار شي مهم كثير بحياتي و حياة عيلتي و هو انو ابوي دخل فلسطين للمرة الثانية  بعد 37 سنة من الغياب و بصراحة هاد كان شي ولا في الاحلام، ما كنت بتوقع هاد الشي ابدا، اني اشوف والدي في نابلس و اني امشي معو و اني اخذو على الجامعة و احكي لو اني تعلمت هون.....صراحة اشياء كثير ما كنت متوقعها و لكن فعلا انو ربنا كبير و الحمد لله على كل شي.

يوم الخميس الصبح جهزت حالي للدوام و كان ابوي و امي موجودين و فاتحين على الجزيرة و انا طلعت برا البيت بس شي قال لي ارجع دق الباب....بصراحة كان معي ساندويش بدي ارجعو لانو جاي على بالي افطر سلطة بالشغل ههههههه...امي فتحت الباب بتحكي شو في؟؟ حكيت لها خذي الساندويش و فعلا اخذتو مني و لسا بدها تسكر الباب....و فجأة سمعت صوت بقول "اعلن عن وفاة ستيف جوبز عن عمر يناهز 56 عاما......" انصعقت....كان الدوام ظايل لو كم دقيقة بس ما لقيت حالي الا جوا البيت و بأشر للجميع يسكتو شوي مشان اسمع هاد الخبر المحزن.....والله ما صدقت....صرت احكي :لأ يا ستيف.....لأ يا ستيف........ابوي فكرني مجنون و امي فكرت انو صارت كارثة و سالوني مين هاد ستيف جوبز............ما عرفت شو اجاوب و لفيت حالي و رحت على الدوام.

بالدوام كنت متنكد و قاعد لحالي و اجا زميلي في القسم على الدوام...سلمنا على بعض....بحكي لو والله اني سمعت خبر بسم البدن....بحكي خير شو في؟؟ قلت له انسى مو مهم كثير....هو اصر يسمع الخبر.....حكيت لو انو جوبز توفى.....بحكي لي شو يعني؟؟؟ احزن على موتى اطفال المسلمين احسن لك........بهاي اللحظة بتحس حالك جاي من مجرة ثانية مش كوكب ثاني.....سكتت و ما حبيت اجادل خصوصا لفرق السن بيني و بين زميلي....

صارت الساعة 10 و صرت اسمع الناس بالشغل بحكو عن الموضوع...حتى في احد المدراء قال انو لازم نروح نحضر العزاء لانو بوزعو دلايل ايفون ههههههه "توزيع الدلايل هي عادة نابلسية قديمة و هي عبارة عن توزيع الكنافة على المعزين في اخر يوم من ايام العزاء"....و مع اني ضحكت الا اني ظليت افكر في وفاة جوبز و بلوم حالي كثير.....لانو معرفتي بحوبز هي معرفة من فترة بسيطة بس و لكن هاي الشخصية كان لها تأثير على حياتي اكثر من ناس كثير عرفتهم من سنين.

للي بعرفني شخصيا و بناقش معي اخبار التكنولوجيا بعرف اني بفضل المصادر المفتوحة و شخصيات مثل ريتشارد ستالمان و لينوس تورفالدس عن شخصيات ثانية زي بيل غيتس و ستيف جوبز....و بصراحة كانت عندي نظرة لستيف على انو انسان محتكر و بالتالي شرير و همه الاساسي انو يربح كمان و كمان و هاي هي....و على غير عادتي ما قرات عن الرجل كثير و ما اهتميت اعرف هاي الشحصية من كل الجوانب.......ما اهتميت اعرف مين هو و كيف بدأ و شو هي سيرة حياتو....و مرت الايام.....

في اواخر شهر رمضان الماضي كنت كالعادة رايح على الدوام و اول شي بفتحو اني بقرأ شوية اخبار على Google Reader منها السياسي و منها التكنولوجي........و لقيت خبر بقول "استقالة ستيف جوبز كمدير تنفيذي لشركة أبل"...بصراحة اول شي ما اهتميت اقرأ لاني عندي اراء في الرجل و بالعربي ما بطيقو.....اصلا توقعت انو تكون حركة من حركات الاغنياء و بدو يعمل فيلم ولا شي او يترك الشغل و يتمتع بشوية نشاطات خبرية و التمدد على جزيرة في البحر الكاريبي هههه....لكني بعد شوية تردد قلت خليني اقرا شو الخبر....مش خسرانين شي....و فعلا فتحت الخبر......

لقيت انو الرجل استقال لانو كان مصاب بسرطان البنكرياس و وصل لمرحلة حرجة كثير و قرات طبعا زي الملايين الي بحبو التكنولوجيا رسالة الاستقالة.....بصراحة كان خبر أثر فيي كثير....حسيت اني كنت ظالم الرجل بشكل غريب و اني اطلقت عليه احكام سيئة كثير و الرجل بعاني و حالتو صعبة....حسيت بتأنيب الضمير لانو هاي مش عاداتي ابدا........عمري ما حبيت اظلم حدا ابدا...و حسيت اني ظلمتو كثير و كان لابد اني اكفر على الخطأ هاد.

روحت يومها على البيت و بلشت ادور على الانترنت عن حياة ستيف جوبز في المواقع الانجليزية و العربية و بلشت اقرأ و انا مع كل سطر انصدم اكثر و اكثر.....رجل استثنائي بكل ما تحمله الكلمة من معاني...ابتداء من طفولته و اصولو العربية " لو انو ظل عن بشار الاسد لكان ممكن يصير اكثر ما فيها مدير مقسم تلفونات هاد اذا كان مدعوم و واسطات و رشاوى" مرورا بخروجو من الجامعة و تعرفو على ستيف وزنياك و شراكتهم في تأسيس شركة أبل و تصنيع اول كمبيوتر شخصي في العالم و اطلاق ابل1 و ابل 2 و الكمبيوتر ليزا و التحقة التكنولوجية "الماكنتوش" و بعدها خروجوا من ابل بسبب الخلاف مع مجلس الادارة و تأسيسه لشركة نكست للكمبيوتر و شركة بيكسار لانتاج افلام الكرتون "الانمي" الي عملت نقلة نوعية في صناعة السينما "يكفي تأثير فيلم حكاية لعبة Toy Story على السينما في العالم" ثم عودتو لابل مرفوع الرأس لياخذ بيدها من حافة الهاوية للشركة التي فاقت شركة اكسون موبيل النفطية الامريكية كأكبر شركة في العالم من الناحية السوقية و يجعلها الشركة التي امتلكت من السيولة النقدية ما يفوق ما هو متوفر في خزينة الحكومة الامريكية و هاد كلو عن طريق سلسلة ابتكارات "i" الي غيرت العالم و ثقافة الناس على وجه البسيطة.

بحثت كثير عن حياة ستيف في اليوتيوب...كنت حابب اعرف عن حالتو المرضية....كنت بدي اعرف مدى خطورة المرض...و لقيت حالي بسمع بخطاب ستانفورد الشهير الي ما راح احطو هون لانو ما ظل حدا الا سمعو....كان خطاب ملهم كثير...عظيم كثير...بسيط كثير...كان خطاب شبه كامل "فالكمال لله وحده"...كان خطاب متواضع....كان في صوتو هاي النبرة الي بتخليك تحس انو بحكي معك في جلسة عائلية و بنصح فيك...كان في هاد الخطاب رغبة من جوبز انو الجميع يفهم انو سر النجاح بسيط للغاية....لانو هاي الايام في ناس بتكتب كتب عن النجاح و بعملو محاضرة و برمجة لغوية عصبية و مش عارف شو..........كلو كلام ما بامن فيه....الانسان لا يمكن ان يبرمج كالالة.......الانسان عندو عواطف و احاسيس و مشاعر و هاد الي خلانا بشر و ميزنا على بقية خلق الله..."الانسان يجب ان يفعل ما يحب و ان يبحث عنه مهما طال الزمن".....لخص جوبز المعادلة في هاي الجملة الي ابهرتني لما سمعتها....خصوصا اني حاليا في مرحلة اختيارات و قرارات راح ترسم خط حياتي لحد ما اموت....كلام جوبز كان مثل الدواء الي بنتظره المريض من زمان....اعطاني القدرة على اني اطمئن الى القرار الي اتخذو لمسار حياتي و الي بتمنى انو ربنا ييسرو لي ياااااا رب....

خطاب ستانفورد كان خطاب رائع...بس كنت بدور على شي بحتوي على خلاصتو في بضع دقائق حتى اني لما بدي ابعتو لحدا اتاكد انو راح يسمعو على الاكيد و فعلا لقيت هاد الفيديو الي بتمنى اني اشوف الشب الي عملو و احكي لو شكرا و جزاك الله خيرا

هاد الفيديو كان خلاصة خطاب ستانفورد.....هو عبارة عن جرعة مركزة ينصح بتناولها يوميا و كلما دعت الحاجة....جرعة غنية من ناحية المحتوى و الموسيقى و الصور....ما في يومين مرو بدو ما اسمعها....و اغلب المرات بسمعها و بتدمع عيوني......مرة سمعتها و بكيت كثير لاني بتمنى من ربنا انو ييسر لي الشي الي نفسي فيه و بحس كل ما اسمع هالفيديو انو ان شاء الله هانت...لقيت حالي ببكي و هو عم يحكي....ما بكيت على وفاة ستيف....كلنا راح نموت...في كثير ناس ممكن يحكو عني مجنون و عن غيري من الي تأثرو بوفاتو و بحكو انو كافر و بوذي و وثني و مش عارف شو.....بحب اقول لهم....صحيح كل شي قلتوه لكنه بالنهاية انسان عظيم غير في حياة كل واحد فينا بشكل مباشر او غير مباشر...و انو النجاح ربنا وهبو لناس غير مسلمين  و انو في حديث شريف للرسول صلى الله عليه و سلم بقول "اطلب العلم ولو في الصين"....احنا ما بنحكي انو كل شي بحياة جوبز كويس و لكن احنا بنحكي عن تفكير الرجل و عن الي قدمو للعالم يا اخوان....

{مر بجنازة على رسول الله صلى الله عليه وسلم فقام لها، فقالوا: يا رسول الله! إنها جنازة يهودي، قال: أليست بنفس } صدق رسول الله صلى الله عليه و سلم

يوم الخميس بالليل كنت ماشي برفيديا....تطلعت على سبيتاني سنتر و تذكرت انو هاد المتجر حاليا معو وكالة ابل في فلسطين....قررت ادخل و اشوف اذا كانو زي بقية متاجر ابل في العالم حاطين صور جوبز على الماك و الاي باد و مقدمين شوية احترام للرجل.....دخلت و لقيت الاجهزة بتشغل افلام و ما عليها شي.....حاولت احط صورة جوبز بدون ما يحس حدا و لكن ما قدرت لانو ما في انترنت على الاجهزة.....حكيت مع الموظف المسؤول و فهمتو انو كل المتاجر الي معها وكالة ابل عاملة هاد الشي كنوع من اظهار الاحترام للرجل بس هو صار يحكي لي انو ما بقدر و لازم يشوف المدير و سياسة شركة و حسيتو بتهرب مني...انا تركتو و خرجت و بعد ما مشت 100 متر كنت بدي ارجع احكي مع مديرو لاني حسيت اني ما بذلت جهدي مشان افهمو القضية بس ما حبيت اطلع بسواد الوجه كمان مرة.

لساتني بحب الاوبن سورس....و مبارح صديق لي طلب رايي في جهاز و نصحتو بالسامسونج جالاكسي رغم انو هو كان مفكر في الايفون....و انا شخصيا ما بفكر اشتري اي منتج لابل بس مع هيك راح اتذكر ستيف جوبز طول عمري....و اذا ربنا قسم لي اني احقق حلمي في اني اكون استاذ جامعي....راح احكي لطلابي عن ستيف جوبز...و اذا ربنا قدر لي اني اكون والد....راح احكي لاولادي عن ستيف جوبز لانو حياة ستيف جوبز هي تجربة عظيمة تستحق التوقف عندها و لو كان ستيف حي و صارت لي فرصة اني اشوفو كنت راح احكي لو.....سيد جوبز.....انا اسف...